Xikhongelo xa Hosi

Print pagePDF pageEmail page

Jes teach Lords Prayer

 

 

 

MAT. 6:5-13

  1. A xiahluko lexi xi vulavula hi xikhongelo xa Hosi lexi yi dyondziseke vadyondzisiwa va yona kuya hi xikombelo xa vona.
  2. Ko tala vanhu va tluletana miehleketo ya vona, matitwele ya vona ni swivilelo swa vona. A ndlela leyi n’wana a kotaka ku tshineleriwa hi mana wa yena i ku rila. Ni muxaka wa marilele wa kota ku endla leswaku mana wa n’wana a kota ku tiva leswi n’wana a swi lavaka. Swi nga endleka a ri ni ndlala, a vabya kumbe a ri ni xivundza xa ku lava ku vukarhiwa, kutani a rila hikwalaho ka sweswo, kutani mama wa n’wana a ta tshika hinkwaswo leswi a swi endlaka hambi ma ri mabulu ni vanghana, a hlamula xivilelo xa n’wana. Kutani loko a kula, a tiva ku vulavula ririmi ra mana wa yena, kutani hi rona leri a nga ta kota vulavula kahle ni mana wa yena hi rona. A va se a swi kota ku lulamisa miehleketo yi va marito kutani a byela mana wa yena marito lawa ma n’wi tsakisaka. Loko a kula a vona swilo swintshwa laha a yaka kona- exikolweni ni vanghana kutani a vuya a ta ta rungulela mana wa yena. Na yena mana wa kona a vulavula ni n’wana leswaku a n’wi khutaza, hi ku n’wi komba rirhandzu, a n’wi dyondzisa ni ku n’wi komba tindlela leti ha tona a nga kulaka kahle ni ku hanya vutomi byo tsakisa ni lebyi hetisekeke.
  3. A xinakulobye xa hina ni Xikwembu xa fana. A Xikwembu i munhu. Hi xona xi endleke tindleve ta hina, milomo ni tindzimi ni vuswikoti bya ku vulavula. Xi hi endle hi xifaniso xa xona ( leswaku hi xitekelela), leswi vulaka leswaku xa ehleketa, xa twa naswona xa vulavula.
  4. Loko hi amukela Yesu tani hi muponisi wa hina, hi tswariwa ra vumbirhi kutani hi hundzuka vana va xona. Leswi vula leswaku loko hi vulavula na xona xa hi twa. Kutani a mimoya ya hina yi va ni vuswikoti bya ku twa leswi Moya wa xona wu vulaka swona eka hina.  Aku khongela i ku vulavula ni Xikwembu ni ku twa leswi xi swi vulaka eka hina. A xikhongelo i ku vulavula xi Xikwembu.
  5. A ndlela ya kahle ya ku khongela, hi leswaku a swi lavi ku khongeleriwa hi munhu un’wana kumbe moya un’wana. A ku na xilaveko xa leswaku u kombela ku khongeleriwa hi munhu la feke leswaku yena a vulavula ni Xikwembu ematshan’wini ya wena. Tani hi n’wana wa Xikwembu, xona i Tatana wa hina. Loko tatana loyi a nga ni rirhandzu a vuya hi le ntirhweni, a vana va tsutsuma va ya n’wi rhendzela va vulavula na yena hinkwavo hi nkarhi un’we.
  6. A nga hlundzuki hi maendlele ya vana va yena. A vuli leswaku, “hayi, sukani la mani.” Ni tatana wa n’wina ni kombana xichavo, yimani kule na mina.” E-E, a tsakile hi ku vona leswaku a vana va yena va nwi rhandza naswona va tiphina hikuva kusuhi na yena, va twa leswi a a le ku swi endleni laha a a ye kona. Na vona va ta nwi rhwexa swikombelo swo tala, kambe a va a ri ni vutlharhi ro kala a nga va nyiki hinkwaswo leswi va n’wi kombelaka swona. Xikwembu Tatana xa tsaka ku fana loko hi xi tshinelela hi ndlela yo taniya, hi ya eka xona hi xikhongelo hi vulavula erivaleni hinkwaswo leswi nga timbilwini ta hina.
  7. Kutani loko hi xi nyika nkarhi, na xona xi ta vulavula na hina hi ku nghenisa miehleketo ya xona etimbilwini ta hina. A xikhongelo i ntsena ku vulavula ni Tatana wa hina wa le matilweni, kutani a swi bohi leswaku un’wana n’wana wa Xikwembu a vulavulela un’wana n’wana wa xona. Hinkwavo vana xa xona va fana emahlweni ka xona kutani  xi lava ku twa rito rin’wana ni rin’wana ra vana va xona.
  8. Hambi tatana wa laha misaveni a nga vuli eka n’wana wa yena wa mangangamila, a ku: “A wu swi koti ku vulavula na mina kahle, kambela makwenu wa wena a ta ta ku vulavulela na mina.” E-e, A titlakulela n’wana wa yena a n’wi veka emalepeni ya yena, kutania a n’wi khutaza ku vulavula kutani a leyisa mbilu a n’wi yingisa. Hi ndlela leyi n’wana loyi na yena a ta dyondza ku rhandza tata wa yena.
  9. A tatana wa kahle hi nkarhi lowu lulameke a tiyimisela ku dyondzisa n’wana wa yena, leswaku va hlengeletisa kuyini miehleketo ni leswi a fanelaka ku vlaswona. A va dyondzisa leswaku va nga vulavuli nhlamba emahlweni ka yena, kambe va ehleketa swinene na loko va nga se vulavula na yena leswaku va ta kota ku vulavula swa kahle leswi nyikaka vutomi. Hi ndlela leyi, yena ni vana va yena va va ni nkarhi wa kahle wa ku tiphina swinene evutonwini. Hi ndlela yo fana, Xikwembu Tatana wa hina xi hi dyondzisa ndlela ya makhongelele ya xona leswaku hi kota ku twisisana ni ku va ni ntsaku na xona. A matsalwa lawa hi madyondzaka, hi lawa ma kombaka hi laha Xikwembu Tatana xi hi dyondzisaka hi kona ku khongela hi N’wana wa xona Yesu Kriste.
  10. A xa ku sungula lexi hi dyondzisiwaka xona hi leswaku a hi faneri ku khongela na hi ni xikongomelo xa ku lava ku voniwa ni ku khensiwa hi vanhu leswaku hi khongela kahle. Eminkarhini ya Yesu, a varhangeri va ta vukhongeri a va khongela na va yime tindleleni, va huwelela swinene hi marito yo nyanyula vanhu lava va twaka, va ri karhi va phinda-phinda marito, a xikhongelo lexi a va rhanga hi ku xi dyondzela ekaya na va nga se ya ku khongelelni. A va nga ri ni xikongomelo xa ku lava ku twiwa hi Xikwembu, a vo lva ku hlamariwa ni ku tsakeriwa hi va hundzi va ndlela.
  11. Xikwembu xi ri a nhlawulo leyi vanhu lava va nga ta yi kuma i ku dzunisiwa hi vanhu ntsena, kambe eka Xikwembu a va nga pfuki va kume nchumu. Na tshemba lesaku hinkwerhu hi tshama hi swi twa hambi ku swi endla swikhongelo swo taniya. Swi nga endleka leswaku murhangeli nadza wa mfundhisi a rhumiwa ku teka xiyenge xa ku khongela exikarhi ka nkondzo, kutani a endla xikhongelo xo leha hi rito leri tlakukeke swinene, ko tala vanhu va kota ku swi twa leswaku munhu loyi a nga vulavuli ni Xikwembu, kambe o lava ku nyanyula vanhu, a komba mufundhisi ni hlengeletano leswaku a xi ba ka ndjani xikhongelo. A munhu wa ma endlele lawa, a nge kumi nchumu eka Xikwembu hikuva se a amukerile eka vanhu.
  12. A Hosi yiya emahlweni yi tshikilela dyondzo leyi yi ku, loko hi khongela a hi ngheneni ndlwini laha ku nga ta kala ku nga ri ni munhu loyi a nga ta hi hlamala ni ku hi dzunisa, Xikwembu hi xona xi nga ta va mbhoni ya leswaku ha xi rhandza hikunene, kutani xi ta hi hlamula swikombelo swa hina. Van’wana va ri leswi swi vula leswaku loko hi khongela hi fanele ku pfala swipfalo swa ti kereke loko hi khongela, kambe loko ku chumayeriwa rito swi tshikiwa swi pfuriwile. A hi mhaka ya ku pfuriwa kumbe ku pfariwa ka tinyangwa, kambe i ku navela ka mbilu loko Xikwembu xi ku langutaka. I ku navela ka munhu loyi a khongelaka loko Xikwembu xi ku nyikaka risima, xikhongelo xa ku lava ku twiwa hi Xikwembu, ku nga ri xa ku lava ku twiwa ni ku hlamariwa hi vanhu. Leyo hi yona mhaka nkulu. Loko xikhongelo lexi endliwaka exihundleni xi ri xa ku tlakusa Xikwembu, xona xi ta hlamula erivaleni.
  13. A xavumbirhi, Yesu a dyondzisa leswaku a hi faneli ku phindha-phinda marito. Van’wana lava nga twisisiki maendlele ya Xikwembu, va kanyaluka swinene loko va khongela va phindha-phindha marito wolawo ya man’we. Leswo a swi tsakisi Xikwembu. Loko leswi hi swi kombelaka swi nga yelani ni ku rhandza ka xona, a xi nga hi nyiki hambi loko hi nga kanyaluka kuya fika kwihi rito. Hi marito man’wana, loko hi kombela leswi yelanaka ni ku rhandza ka yena hi kuma nhlamula hi ku hantlisa. ( Swa endleka leswaku a xikhongelo lexi xi ri xa ku huhuteriwa hi Moya lowo Kwetsima, wu ta endla leswaku xi khumba mbilu ya xona, ku fana na Ana na Yesu eGetsemana.)Minkarhi yin’wana hi nyika swivangelio swa hina swa leswi hi swi lavelaka swona swilo, ku fana ni leswi hi vulavurisaka swona ni vanhu vanwana; hi xikombiso hi nga ku: “Tatana ha kombela hi nyiki swakudya hikuva hi twa ndlala, se hi ni masiku yo tala na hi nga se tshama hi dya nchumu.” Naswona hi nga xi tsundzuxa switsembiso swa xona eka hina: “Hosi, hi wena la nga te, ‘Loko hi kombela hi ta nyikiwa. Hosi, hi wena u nga te loko n’wana a kombela nhlampfi eka tata wa yena, a nge n’wi nyiki nyoka; loko a kombela vuswa, a nge n’wi nyiki ribye, kutani wena u te, loko tatana wa laha misaveni a nyika n’wana wa yena leswi a swi kombelaka, xana Tata wa n’wina wa le tilweni a nga kala a nga mi nyiki ha yini leswi mi swi kombelaka xana.” Xikwembu xi tsakela leswaku hi xi tsundzuxa switshembiso swa xona. Naswona hi fanele ku vulavula na xona hi marito yo twisiseka lama fanelaka. Xi hi nyike vuswikoti bya ku ehleketa kutani xi lava leswaku hi swi tirhisa loko hi vulavula na xona. A hi fani ni tihome leti ngo yima egedeni ti languta ntsena. Loko hi ehleketa hi ku enta ni hi ntiyiso, a Moya wa Xikwembu wu kuma nkarhi wa ku komba ndlela miehleketo ya hina kutani hi kota ku swi vona ni ku swi twisisa leswi hi fanelaka ku kombela swona emahlweni ka Xikwembu, a hi faneli ku khongela Xikwembu hi loko hii ri ni xi laveko xo karhi, kambe hi khongela hambi loko hi nga vileri nchumu. Hi marito man’wani, loko xikombelo xa hina xi lulamile emahlweni ka xona, xi ta tisa ku kholwa etimbilwini ta hina leswaku leswi hi swi khongelaka swi yelana ni ku rhandza ka xona., kutani timbilu ta hina ti ta tatiwa hi ripfumelo, kutani hi ta kombela hi tiyile leswi hi swi lavaka eka xona.
  14. Hi ndlela leyi, hi taya mahlweni hi dyondza leswi ku rhandza ka Tata wa hina wa le tilweni ku nga xi swona eka hina, kutani hi ta ya emahlweni hi xi tiva ku anpswa.
  15. Hikwalaho ka yini hi fanela ku khongela? Eka tivhesi leti hi nga ku ti languteni, xi hi tsundzuxa leswaku xi tiva leswi hi swi vilelaka na hi nga se kombela. Hikwalaho ka yini ke hi fanela ku khongela? A nhlamulo hi leswaku xi lava leswaku hi va ni nkarhi wa ku vulavula na xona ni ku xi yigisa, leswaku ku akeka xinakulobye xo enta exikarhi ka hina na xona. A xo lava ku hi nyika swilo swa misava leyi ntsena, kambe xi lava ku hi nyika vuxona bya xona. A manana wa kahle a nyiki ntswamba  ni muphungu ntsena n’wana wa yena, kutani a n’wi tshika a tshama kule na yena ehansi ka nsinya, e-e, a nwi nyika swakudya na a nwi vukarhile a ri karhi a vulavula na yena, hikuva a lava leswaku n’wana wa yena a dyondza ku n’wi rhandza ni ku n’wi tiva leswaku hi yena manana wa yena.
  16. A hi languteni ke marito ya xikhongelo lawa Yesu a ma dyondziseke. A sungule hi marito lawa: “Tatana wa hina la nga ma tilweni.”
    1. A rito leri nge ‘Wa hina” ri ni tsundzuxa leswaku Xikwembu xi ni vana vo tala ni leswaku mina ni lumba muti wa xona lowu kulu. Entiyisweni a njangu wa Xikwembu i wu kulu ku tlula minjangu hinkwayo leyi hi yi tivaka. A njangu wa xona i wu kulu ku tlula hinkwayo, xi ni vana misaveni hinkwayo ni le tikweni rin’wana ni rin’wana. Van’wana va va makerhu va mina i vo basa, van’wana i va nkwalala, van’wana i va halandi, van’wana i va ntima, van’wana va lehile, van’wana va komile, van’wana va tlharihile, van’wana va kota ku endla swilo hi mavoko ya vona, naswona ku na vo tala lava kotaka ku yimbelela swo tsaseka. Hi njagy lowu kulu ngopfu swinene, kutani na ti nyungubyisa hi ku tiva leswaku ni lumba njangu wo kurisa leswi.
    2. A xa vumbirhi i rito ra ku ‘Tatana’ ri ni tsundzuxa leswaku ni tswariwile ra vumbirhi hi mbewu ya risima ngopfu swinene. Xana wa swi tiva leswaku a varimi lava pfundzeke ngopfu a va dyi mbewu leyi va yi tshoveleke masinwini ya vona xana. E-e, va tirhisa mbewu leyi va tivaka leswaku yi kula kahle ku nga ri ku dya kambe ku byala hi yona. A mbeyo yi cheriwa murhi leswaku yi nga phehliwi hi swivondzoloti. A ku hlayisa mbewu swi dura ngopfu swinene kambe swa vuyerisa hikuva loko yi byariwile hi ta humesa ntshovelo wu kulu naswona wo saseka. A ku endla leswaku munuhu a tswariwa ra vumbirhi, Xikwembu xi nghenisa mbewu ya xona ya moya eka munhu, kutani a tswariwa ndzeni a va n’wana wa xona. A mbewu ya Xikwembu yi phela ku tlula timbewu hinkwato ta vatatana va laha misaveni kutani a mbewu leyi, loko u tswariwile ra vumbirhi, yi ku endla munhu muntshwa, leswaku u va ni vuswikoti bya ku vitana Xikwembu Tatana wa wena. Naswona swi vula leswaku u nga khongela u tsakile hi ripfumelo.
    3. A ra vunharhu ri ri: “Loyi a nga matilweni.” A tatana wa laha misaveni a hi nkwaswo leswi a nga kotaka ku ni nyika. Swi nga endleka a swi tsakela ku nyika kambe a tsandzeka hi hikwalaho ka ku pfumala. Kambe tatana wa hina wa le tilweni wa swi kota hinkwaswo. Hinkwaswo leswi va tatana va laha misaveni va nga na swona i swa tatana wa hina la nge matilweni. A nga ni nyika xin’wana ni xin’wana lexi xi ni fanelaka, naswona a hi nyika ndzhaka ya swa moya ku fana ni, ku rivaleriwa swidyoho, vutomi lebyi nga heriki, ntsaku, ku rhula ni vuswikoti bya ku hlula ku navela ka leswo biha evutonwini bya hina. Wa swi kota ku khumba vanhu van’wana leswaku va ni rhandza ni ku ni tsakela. Xa swi kota ku ni biyelela vusiku ni hlikanhi. A xi veleri leswaku xi ni nyike kangani, a swi xi endli xisiwana hi ku ni nyika. I tatana wa mina la nga riki mutsandzeki, a ku na munhu la nga n’wi yimisaka ku ni endlela leswinene.
  17. A vhesi yoleyi ya yin’we yi ya emahlweni yi ku: “Vito ra wena a ri hlawuriwe.” Leswi vula leswaku: A vito ra wena a ri dzunisiwe ni ku xiximiwa ni vanhu hinkwavo.” Loko hi hlangana ni munhu la xiximekaka, a hi nge mwi kombeli leswaku a hi lomba xikomu xa yena kumbe swin’wana. Hi nga ku: “A wu xeni. Ni tsakile ku ku vona. Mi ndjani? Xana a ndjangu wa nwina wu ndjani?” Hi ku endla leswi hi komba rirhandzu ni xichavo eka yena. Swi nga languteka na wu nga dyondzekanga loko loko hi ku hantlisa u nghenisa xikombelo xa wena.
  18. Hi fanele ku tsundzuka leswaku Tatana wa hina wa le tilweni i munhu ni leswaku hi fanele ku n’wi katekisa ni ku n’wi endla a ti twa kahle hi hina, loko hiya eka yena. Yesu a hi dyondzisa ku katekisa tata wa yena loyi naswona a nga Tata wa hina, hi ku n’wi gandzela ni ku tlakusa vito ra yena. Loko hi gandzela vito ra xona, hi gandzela vumunhu bya xona. Hi nga swi kota ku: “Tatana ha ku dzunisa, ha ku rhandza, ha ku gandzela. U tatana wo hlamarisa. A nga kona wo fana na wena. Onge misava hinkwayo yi nga dyondza ku ku tiva.”
  19. Avhesi leyi landzelaka yi hi dyondzisa ku rhangisa swa xikwembu ku sungula hi ku khongela, A ku te ku fuma ka wena, ku rhandza ka wena a ku endliwe misaveni tani hi leswi ku endliwaka etilweni.”
  20. Loko tatana wa mina wa laha misaveni a a yo pfundza, kutani a lava ku aka komponi yikulu laha mimovha ya madzana-dzana a yi ta endleriwa kona sisku rin’wana ni rin’wana, na u swi tiva leswaku ku nga ri khale a vusiwana bya n’wina byi ta hela, ni leswaku a ku humelela lokuya ka ku lumba na wena, a wu ta navela leswaku a humelela eku akeni ka yena komponi ya yena. Swi tano, loko u swi tiva leswaku Tatana wa wena wa le matilweni, a le ku akeni ka tiko rikulu leri nga ni switarata swa golidhi, ni leswaku na wena ra ku lumba, wa fanela ku va ni ku tsaka swinene eku khongeleni leswaku a Mfumo lowuya wu hantlisa wu hela ku akiwa wena ni vamakwenu va ximoya mi susiwa eka vusiwana leswaku ni ya etikweni ra ku kwetsima laha ku nga ha riki ni vubihi, vuyivi, makwanga, torha, ndlala laha ku nga ha riki ni ku hisa ka dyambu ni dyandza. Loko hi khongela leswaku a ku te ku fuma ka xona hi le ku pfunene ku ka ku aka. A marito ya hina i switina swa ku aka kutani a ripfumelo ra hina i semendhe ra kona. Leswi hi swona hi fanelaka ku sungula hi ku khongelela swona swi endleka na loko hi nga se khongelela swa hina swa laha misaveni.
  21. Kutani hi fika eka swivilelo swa hina: “Hi nyike vuswa bya hina bya siku rin’wana ni rin’wana”  a vanhu vo tala va xaniseka hi ndlala hikuva a va khongeli. Van’wana va khongela kambe a va pfumeri leswaku Xikwembu xa hlamula. Loko n’wana a ku “Mama, ni kombela ku ni nyika mati,” kambe a fularhela a ya laha ku lahleriwaka kona mati ya nsila a ya kokodyela mathonsi ya mati kona, xana a mana wa yena a nga hleketa yini? A nga hlundzuka hikuva a n’wana a nga n’wi tshembanga mana wa yena. Hi fanele ku tshemba Xikwembu leswaku xi hlamula swi khongela swa hina, leswaku xi hi nyika leswi hi swi lavaka namuntlha. Xikwembu a xi nga hi nyiki swivilelo swa mundzuku namuntlha. Kambe xi hi nyika leswi lulameleke siku rin’wanan ni rin’wana.
  22. A ku khongela a swi pfaleli ku tirha. Xi hi nyka leswi hi swi lavaka hi ku hi katekisa hi ntirho wa mavoko. Xikwembu xa phamela hambi hi swinyanyana, kambe a xi rhumeli ntsumi yi swi yisela swivungwana laha swi tsameke kona emisinyeni. A xinyanyana xi fanele ku huma exisakeni xi haha xi famba xi lava, kutani Xikwembu xi ta xi pfuna leswaku xi ko xi kuma xivungu kumbe ndzoho. Kasi van’wana vanhu va tirha na va nga khongeli; van’wana va khongela na va nga tirhi, kambe hi fanele ku endla hinkwaswo, sungula hi ku khongela kutani uya ku tirheni, a swilo leswimbirhi swa tirhisana.
  23. Naswona hi fanele ku khongela leswaku Tatana wa hina a hi rivalela milandzu ya hina; ku vuriwa swidyoho swa hina.
  24. Leswi a swi lavi ku vula leswaku loko hi rivala ku kombela rivalelo ku nga ri ha vomu a hi nga rivaleriwi. I ntiyiso leswaku ha tikuma hi endle xidyoho na hi nga tiyimiselanga. A risima ra ku tivula swidyoho, hileswaku hi tiyisa leswaku ha pfumela leswaku ku swo karhi leswi hi swi endlaka swi nga xi tsakisiki Xikwembu, kutani a hi rigeti ku fihla, kambe hi lava leswaku hi basiseriwa swona evutonwini bya hina hi matimba ya Xikwembu.
  25. Loko hi nga tisoli eka swidyoho swa hina hi vomu, xi sungula ku kula xi dzima timintsu kutani xi kula xi endla nsinya wa mintwa leyi sivelaka ku pswala mihandzu. A xa risima eka vutomi hi leswaku loko hi dyohile hi fanele ku hantlisa hi tisola. U nga endli xitoriya xo leha. Vula leswi ntsena, “ Hosi na tisola hikuva ni hleve João. A ni endlaka swilo swa kahle. Na tisola. Ni rivaleri. Amen.” Kutani unga ya emahlweni u famaba ni Xikwembu u tsakile ni hi ku titsongahata.
  26. Kambe tiva leswaku Xikwembu xi hi dyondzisa ku khongela leswaku hi ta rivaleriwa tani hi laha na hina hi rivalelaka van’wana lava hi dyohelaka. Loko hi lava leswaku Xikwembu xi hi rivalela, hi fanele ku rivalela lava va hi dyoheleke na hina. Loko hilava Xikwembu xi rivala hi swidyoho leswi xi hi rivaleleke swona, na hina hi fanele ku rivala swidyoho swa lava hi va rivaleleke, hi nga ha pfuki hi swi trsundzukile.
  27. Kutani hi fanele ku hetelela xikhongelo xa hina, hi marito yo fana ni lawa: “Hikuva a ku fuma, ni matimba ni ku twala i swa wena hi laha ku nga heriki. Amen.” Loko hi ti khongelerile ni swivilelo swa hina, hi fanele ku tilavisa, kutani hi languta vukulumba bya Xikwembu xa hina, ni ku pfumela leswaku  a vutomi lebyi nga heriki ni matimba hinkwawu ni ku kwetsima  hinkwaku ku lumba xona ntsena. Hi ndlela leyi, a hi xi nyiki ku dzuneka ntsena, kambe loko hi vona vukulukumba bya xana, a timbilu ta hina ta tala hi ripfumelo ra leswaku a xikhongelo xa hina xi hlamuriwile Hi pfala hi rito leri nge, ‘Amen’, leswi lava ku vula leswaku: “ Na kholwa ni ku pfumela leswaku a xikhongelo xa mina xi hlamuriwile.”
  28. Hosi Yesu Kriste a dyondzise vadyondzisiwa va yena ku khongela loko va n’wi komberile. A nga va dyondziselanga leswaku va fanele ku hamba va yimbelela marito ya xikhongelo xa Hosi, e-e, a o va boxela ntila wa makhongelele, kambe a va fanele ku tirhisa marito ya vona va tivisa swivilelo swa vona eka xona. Loko Yesu a tlhelerile etilweni, A rhumele Moya wa yena lowo kwetsima leswaku a ta ta hanya na hina, kutani loko hi pfuleka eka yena, a ta ya emahlweni a hi dyondzisa ku khongela. Tani hi laha u kulaka hi kona emoyeni, onge u nga ya emahlweni u kula eka xiyimo xa xikhongelo.

PLEASE GO TO “CONTACT US” TO SEND US YOUR REQUEST, QUERY OR COMMENT