Ku tsunxiwa ka n’wana loyi a a khomiwe hi mademona

Print pagePDF pageEmail page

Jes deliv demon pos boy

 

 

 

LUKA 9:37-43

  1. Loko a vadyondzisiwa lavanharhu va ri karhi va vona ku kwetsina swin’we na Yesu entshaveni, a vadyondzisiwa lan’wana a va sarile a va ri ri ni siku ra ku avanyisiwa ka vona ehansi ka ntshava. Tatana wo karhi a va tisele djaha ra yena leri a ri vabya, a ri khomiwe hi mimoya ya mademona. A ri le eka xiyimo xo tika swinene. Loko mademona ma n’wi hlasela a swi languteka onge ma lava ku n’wi dlaya. Swi twelisa vusiwana loko u vona munhu loyi a khomiweke hi mademona. A munhu wo tano wa huwelela swinene hambi ku vukula onge hi mbyana leyi vabyaka, a tlhutlha khuvi enon’wini, a wa ehansi a songa-songa onge i nyoka loko yi biwa hi nhonga. Kutani loko mademona ma huma eka munhu wo tani, ma n’wi siya na a karhele swinene, kutani a navela ku etlela na a nga se vulavula.
  2. Loko vadyondzisiwa va hlangane ni nyimpi leyi ya matimba ya sathana, a va tshukisiwe ngopfu ni tshemba leswaku hambi ku chava a ku ri kona exikarhi ka vona ka leswaku a ri pfumelo ra vona ri herile. Loko Yesu a va rhumile, a va nyike matimba ni vulawuri bya ku hlongola mademona, kutani loko va vuyile hi le ntirweni lowu a a va rhume wona, va rungule ndzava na va tsakile swinene, va vula hi laha mademona ma va chavaka hi kona. Kutani lana a va le ku tinganeni hikuva hambi leswi a va ma hlongola mademona eka djaha leriya, a ma nga humi eka yena. Swi nga endleka va hete tiawara to tala na va le ku hlongoleni ka mademona lawaya kambe a swi kotekanga.  Va fike laha va nga hela timbilu kutani ni tatana wa djaha na yena swi va tano. Swi nga endleka a hleketile a ku, a vavanuna lava i valandzeri va Yesu siku rin’wana ni rin’wana, a va fanela kuva ni matimba yo fana ni ya Hosi ya vona, kambe swi laviteka onge va tekele hansi a vuswikoti bya vona.
  3. Hinkwavo ka vona va fanele va tshunxekile loko Yesu a fikile exikarhi ka vona, hikuva a va swi tiva leswaku hi yena nhlamulo ya ku karateka ka vona hinkwaku. A va tiyisile hikuva ku nga ri ku ngani, loko mademona ma kombise matimba ya wona, Yesu a kombise matimba ya yena lama ku kutani a ma hlongola ivi a nyiketa djaha eka tata wa rona. Hi xinkarhana a ku karhateka ni ku chava a ku tshoviwile, a ku hlamala ka ku tsandzeka ka lava a va le ku swi vonene, ku hundzuke xihlamariso lexi kulu xa ku vona matimba ya Xikwembu ma tirha hi N’wana wa xona, Yesu Kriste.
  4. Kambe Yesu a nga swi tshikisanga xileswiya. Swi voneka onge a a le ku vileleni hikwalaho ka ku tsana ka ximoya ka vadyondzisiwa va yena ku tlula xiyimo lexi djaha leriya a ri le eka xona, kutani a va holovela a ku: “ Oh, rixaka ro kala ku pfumela,” Yesu a engeta a ku, “ Xana ni tava na n’wina ku fikela rini.” A nkarhi wa leswaku Yesu a suka emisaveni leyi ni wa leswaku a vadyondzisiwa va yena va sala ni ntirho, a wu ri kusuhi, hikokwalaho a a khunguvanyekile hikuva endzhaku ka loko a va nyike tidyondzo to tala ta rito ni ta leswi komekaka, a va ha kombisa ku tsandzeka ni ku kala ku langutela.
  5. Eka Evhangeli ya Matewu hi vona swo tala mayelano ni leswi nga humelela exikarhi ka vona ( Mat 17:20) Vadyondzisiwa va n’wi vutisa leswaku hinkwalaho ka yini hi tsandzekile ku ri hlongola xana? Kutani Yeasu a va hlamula a ku: “Hikwalaho ka ku tsana ka ku pfumela ka n’wina. Ndzi tiyisile ndzi ri ka n’wina: loko mi ri ni ripfumelo loku ringanaka ni ndzoho ya murhi wa sina, mi nga ku ka ntshava leyi: ‘Rhurhela lahaya!’ kutani yi ta rhurha , ku ri hava lexi xi mi tsandzaka.
  6. Hi ndlela leyi, Yesu a va pfunile vadyondzisiwa va yena hi ku va byela leswi nga vangela ku tsana ni ku tsandzeka ka vona: Hileswaku a va nga tisonanga ku antswa ni ku khongela. A xikhongelo xi na risima hikuva loko hi khongela, hi tivula ku tsana ka hina kutani hi ku: “Hosi, ni tsanile, ni kombela ku ni nyika matimba. Hosi a ku tshemba ka mina hinkwaku ku le ka wena.”
  7. Na hina hi endla swihoxo swo fana loko swi fika lka xikhongelo xa ku titsona swakudya. Hi tirhisa matimba ya hina loko hi hlangana ni swikarhato evuton’wini, kutani loko hi tsandzeka, hi lumbeta Xikwembu. Kambe na wu ri nadzu wa hina. A kuva hi amukela matimba eka Xikwembu hi fanele ku va ni nkarhi wa ku dyondza rito ra Xikwembu ni wa ku khongela, kutani xi ta yi vona mbewu ya ndzoho ya sinapi ya ripfumelo etimbilwini ta hina, leyi nga ni viswikoti bya ku hindzimuxa tintshava hinkwato leti sathana a ringetaka ku ti simeka evuton’wini bya hina.
  8. A xa ku hetelela lexi Yesu a xi vuleke eka vona hi lexi: (Luka 9:44) “Rhiyani tindleve mi yingisela swinene. Ndzi ri: N’wana wa munhu U ta nyiketiwa emavokweni ya vanhu.” Yesu a a swi tiva leswaku leswaku a ku vambiwa ka yena ku le ku suhi, kutani a engeta eka vadyondzisiwa leswaku va yingisa swinene marito ya yena etimbilwini ta vona hikuva a va ta malava marito ya yena loko nkarhi wu fika wa leswaku a khomiwa a yisiwa ku feni, kambe a vadyondzisiwa va yena a va nga swi twisisa leswi a a vula swona hikuva a va hleketa leswaku a va pfumela leswaku, Yesu a tele ku ta ta pfuxa Mfumo wa Israele kutani vona na Yesu a va ta fuma muti wa Yerusalema. Onge Xikwembu xi hi pfuna wena na mina leswaku hi twisisa a dyondzo ya Kriste ni ku yi hlayisa etimbilwini ta hina.

PLEASE GO TO “CONTACT US” TO SEND US YOUR REQUEST, QUERY OR COMMENT