Ku hanyisiwa ka munhu wa nhlokonho

Print pagePDF pageEmail page

Jesus cleans leprosy

LUKA 5:12-16

  1. Yesu a nga telaka ku ta ta hanyisa vanhu emirini ntsena, kambe a tele ku ta ta vuyisela xinakulobye xa vona ni Xikwembu. A tela ku ta ta hanyisa timbilu leti vabyaka ku nga ri miri leyi vabyaka. Hambiswiritanu a ve ni mbilu ya ntwela vusiwana eka vanhu hinkwavo lava a va twa ku vava emirini, hikokwalaho a nga zanga a va fularhela.
  2. Eka xiahluko lexi hi dyondza hi wanuna loyi a a ri ni vuvabyi bya nhlokonho loyi a teke ka Yesu a ta ta hanyisiwa. A nhlokonho i vuvabyi byo chavisa ngopfu swinene. Muxaka un’wana wa vuvabyi lebyi bya nhlokonho byi endla leswaku u basuluka ni ku huma swirhumbana ehansi ka xikhumba exikandzeni ka tindleve ni tinhompfu, ku basuluka kun’wani ku tikomba emavokweni ni le tindleveni. Munhu wa vuvabyi lebyi ko tala a ni risema ro biha swinene, kutani loko a nga kuma vutshunguri bya kahle hambi swinkunwana ta milenge ni ta mavoko ta tsemeka hikwalaho ka xitsongwatsongwana lexi. Swi fika laha swi nga ni tingana ku languta loyi a nga ni vu vabyi bya hlokonho, laha swi fikaka ka ku a komberiwa ku tifunengeta hi nguvo leswaku a nga voniwi.
  3. Ehenhla ka leswo hinkwaswo, a vuvabyi bya nhlokonho bya tlulelana, leswi bohaka leswaku lava nga riki na byona va nga pfumeleriwi ku tshinelela loyi a nga na byona, leswaku ku vhikeriwa ku tluleta vanhu, vanhu va vuvabyi lebyi va susiwa exikarhi ka tiko. Hi ndlela leyi, a fanela kuya hanya vutomi bya xivundza ehandle ka munti. Hikuya hi nawu wa Muxe, a munhu wa mavabyi bya nhlokonho a a nyamile emoyeni, kutani a a nga fanele ku hanya exikarhi ka vanhu va Xikwembu. Hi dyondza leswi landzelaka hi xikombiso eka ya Va-Lev. 13:45-46: “Munhu loyi a khomiweke hi vuvabyi bya nhlokonho, ú fanele ku ambala switlakati, a tshika ni misisi yi hangalaka, a funengeta ni nomo wa le henhla, a huwelela a ku: A ndzi tenganga! A ndzi tenganga! Munhu loyi a nga tenganga loko a ha vabya, ú ta va a nga tenganga; ú fanele ku tshama a ri yexe ehandle ka mixaxa.
  4. A vutomi bya munhu wa nhlokonho emasikwini lawaya a byi tika ngopfu swinene. A a fanele ku lahlekeriwa hi vudyelwani ni maxaka ya yena, hambi nsati/nuna ni vana. A a fanele ku rivala matshamele ya munti wa yena, loko ku nga ri na munhu wa ku nwi heleketela swakudya, a a nga heti masiku yo tala na a ha hanya. A munhu wa nhlokonho a a hanya xivundzeni, a ri ni xinakulobye ntsena ni vanhlokonho-kuloni. Xi ve xona xiyimo xa wanuna loyi a teke ka Yesu.
  5. Xana a swi kotise ku yini ku ta eka Yesu a nga khandliwi hi maribye? Swona ntsena a ku ri mahlori. Hambiswiritano, loko munhu a lava ku ta eka Yesu, Xikwembu xi endla ndlela. Un’wana a vule leswaku a mudyohi loyi a nge ku laveni ka muponisi ni muponisi loyi a nge ku laveni ka mudyohi, siku rin’wana va ta hlangana.
  6. Loko a vona Yesu a tiwisela emilengeni ya yena a rila a ku: “Hosi, loko ú swi rhandza, ndzi kombela leswaku ú ndzi basisa (ndzi hanyisi)!” Hi marito lawa ni hi matikhomele ya yena hi kota ku vona ripfumelo ni ku titsongahata. Naswona hi vona ku navela lokukulu ka ku lava ku hanyisiwa emoyeni, hikuva a kombele ku basisiwa hi Yesu, ku nga ri ntsena ku hanyisiwa. A lava ku basisiwa a endliwa lonthswa, leswaku a ta kota ku nghena etempeleni a nyikela gandzelo ra yena ku fana ni vanhu van’wana, ni ku hanya ni vanhu va Xikwembu.
  7. Xana Yesu a endle yini? A tshambulute voko ra yena eka wanuna loyi a a ariwile, loyi a a khomiwe hi vuvabyi byo vava, kutani a ku ka yena: “Ndzaswi tsakela, basisiwa.” Yesu a nga va dhumelanga vanhu vo vabya ni vadyohi. Kambe loko va n’wi vitana a a va hundzukulela hi ku hantlisa a va yingisela eka swivilela ni swikombelo swa vona.
  8. Loko a te: Ndza swi tsakela basisiwa,” loyi wa nhlokonho a a basisiwile hi nkarhi wolowo (ku hanyisiwa).
  9. A swi vanga leswo ntsena. Yesu a n’wi nyike xileriso tani hi laha swi tsariweke hi kona enawini wa Muxe, wa leswaku a ya eka vaprista leswaku va ya n’wi kambela. Loko vaprista va pasisa ku basisiwa ka yena (ku hanyisiwa), a a fanela ku humesa gandzelo ra ku khensa hi kuya hi nawu wa Muxe. Leswi a swi komba ku nyika vuxiximeki Xikwembu.
  10. Oh, rirhandzu ni tintswalo ta Yesu. Wanuna la nga xaniseka swinene, sweswi hi loyi baseke naswona a languteka a hambanile ni xiyimo xa yena xa khale. A miri wa yena a wu pfuxeleriwile, a ku nunhwa loko a a ri na kona a ku sukile, a switlakati ni swifunengelo leswi a a tifunengela hi swona ku siva vuhava ni ku nunhwa ka yena a a fanela ku swi hisa hikuva a miri wa yena hinkwawu a wu horisiwile, kutani a nga ha ri ni tingana ku humelela emahlweni ka vanhu. Kutani a swi koteka leswaku a hlangana ni vanhu va Xikwembu hambi ni vaprista.
  11. Eka masiku ya hina a ma talanga mavabyi ya nhlokonho, hikuva kuna tindzawulo laha vuvabyi bya nhlokonho byi tshunguriwaka kona hambi hi ku hanyisiwa. Kasi a nhlokonho wa le moyeni eka vanhu wa ha ri kona naswona wa ha nyanya ku biha ku fana ni khale. Wu khumba swiyimo hinkwaswo swa vanhu hambi hi ti- VIP ( Vanhu va swiyimo swa le henhla) wa voneka nhlokonho. A chaka ra le ndzeni ri tikombisa hi makolo, vuoswi, vudakwa, ku kala ku tshembeka ni swin’wani swo tala. Ku na vuvabyi bya ximoya etikweni ra hina lebyi kombisiwaka ni le ka mahungu. Kambe hi khensa Xikwembu hikuva vanhu vo tala va kota ku titsumbula vona hi voxe, kutani va vona xiyimo lexi vange eka xona, kutani va navela ku basisiwa.
  12. Hikuva un’wana ni un’wana la nga ni ku navela ko tano, hi vona mahungu lamanene, a nga ku khensa Hosi Yesu la hi hakeleleke milandzu ya hina exihambanwini ni leswaku ngati ya yena ya swi kota ku hi basisa hi kutsopeta ka tihlo. 1 Yoh 1:9: Kambe loko hi tivula swidyoho swa hina, Xikwembu xa tshembeka, xi avanyisa hi ku lulama, kutani xi ta hi rivalela swidyoho swa hina, xi hi hlantshwa xi susa ku homboloka ka hina hinkwaku.
  13. A ku navela loko sukelaka mbilwini ku fanele ku va ka leswaku u va munhu la baseke ni ku va xirho xa vanhu va Xikwembu lava baseke. A munhu wa mahanyelo lawa, a a nga ta basisiwa milandzu ya yena ntsena, kambe ku tava ni ntirho wukulu wa Moya lowo Kwetsima lowu nghenaka embilwini wu hlasela nala la naga nhlokonho wa ximoya. Leswi swi endlekela munhu loyi a navelaka ku famba eku baseni, kutani ku ta endleka, hi ndlela leyi, a kuma ku hlula eku naveleni ka leswo biha.
  14. Yesu wa swi kota ku hi hanyisa emirini ku fana ni nkarhi lowu a nga famba laha misaveni hi nyama. Loko u nyikerile vutomi bya wena hinkwabyu eka yena, n’wi tshembi leswaku a ku hanyisa, hikuva ku ni minxaka yo hambana-hambana ya vuvabyi lebyi nga kona lebyi hambi hi vadokodela a va byi koti ku byi hanyisa, Kambe eka Xikwembu lexi vumbeke miri wa hina swa koteka.

PLEASE GO TO “CONTACT US” TO SEND US YOUR REQUEST, QUERY OR COMMENT